ያቺ የአንድዬ ምሩቋ - ቀለም ያልገባት እናቴ

አጥና ልጄ ትለኝ ነበር - ፊደል አቅርባ ከፊቴ

ለየኔታ ትከፍለው ዘንድ -አንድ ሽልንግም ቸግሯት

ከእውቀት ገበያ ቀርቼ -ልጅዋ ከቤት ብውልባት

ልቧ በቁጪት በልዞ - የምታደርገው ቢጠፋት

ያቺ የአንድዬ ምሩቋ -ቀለም ያልገባት እናቴ

ሀ በል ልጄ ትለኝ ጀመር -ፊደል አቅርባ ከፊቴ

በቃል ፊደል ቆጠራዋም ከ ሀ እስከ ሆ እየደገመች

በጠቋሚው ስንደዶዋ ከ በ እስከ ቦ እየተመመች

ሀ በል ልጄ ትለኝ ጀመር - በሳሩ በ ' እያሳይች

ፊደል አለመለየቷን - ጪንቀቷን መች ተረድቼ

ሆ ማለቴን ቀጠልኩ እንጂ - ጣቴን በ ቦ "ላይ ሰክቼ

በአሻሮ ጪስ ተጨናብሳ - ምስኪኗ እምዬ የኔ እናት

ያቺ መከረኛ ሽልንግ - ከመዳፍዋ ስትገባላት

ወደ የኔታ ስትወስደኝ - መቼ በወጉስ ነጋላት

ከአናት ሀ ን እየጠቆሙ ሀ በል ሲሉኝ የኔታ

እኔም ከእናቴ ባወቅኩት በ ን እየጠቆምኩ ሳምታታ

በቁንጥጫ መዠለጉኝ - ጭኔ ከእንጆሪ እስኪቀላ

ሚጢጢዋ ልቤ አዝና -መፈጠርዋን እስክትጠላ

ፊደል አለመለየቷን - ችግሯን መች አውቄላት

አስቆነጠጥሽኝ ብዬ እንጂ - የቁም ስቅሏን ያሳየኋት

ታዲያ ለዚህች ለናቴ ፊደል ላልዘለቀች ምስኪን

ምን መንፈስ ይሆን ሹክ ያላት እውቀት ብሩህ ተስፋነቱን ?

ያቺ ያንድዬ ምሩቋ -ቀለም ያልገባት እናቴ

አጥና ልጄ ትለኝ ነበር - ፊደል አቅርባ ከፊቴ

ሳ/አ