የኔ ቢጤ ወፍ ዘራሹ - ምን ሆንክ ባይ ባይኖረውም
የታመመን መጠየቁ - የዘመድ አዝማድ ወግ ነው ጥንትም
በሽተኛን ማስታመሙ - ሲወርድ ሲዋረድ የቆየው
ታማሚው ሁሌ ሰው ሆኖ - ሃገር ጤና ብትቆይ ነው

ግን እንደ ዛሬው! እንዳ ሁኑ!... አገር ጤና አጥታ ስትሰቃይ
በመርገምት የመሃጸን ፍሬዋ.. ቃሬዛ ወድቃ ስትታይ..
እምን ላይ ሆኖ ሊታመም በሽታው እንኳ ባይጠፋ?
እማን ላይ ሆኖ ሊጠየቅ ምን ሆንክ ባይስ ባይከፋ ?

የኔ ቢጤ ወፍ ዘራሹ - ምን ሆንክ ባይ ባይኖረውም
የታመመን መጠየቁ - የዘመድ አዝማድ ወግ ነው ጥንትም
ግን እንደ ዛሬው! እንዳ ሁኑ!... አገር ጤና አጥታ ስትሰቃይ
በነቀርሳ ፍሬዎችዋ ነቀርሳ ይዟዋት ከደከመች
መታመሚያም ይቸግራል - መታመም ቢችል እንኳ ገላ
መማቀቂያውም አይገኝ - መማቀቁ እንኳ ቢሟላ

ለኔ ብጤ መናጢ እንኳን - ብቻውን ለተፈጠረ
እንደ ጥንቸል ልጅ -አንድ ሆኖ - ነጠላ ሆኖ ለኖረ
መታመሚያው ማገገሚያው - ሃገር ነችና አትታመም
የዘመድ አዝማድ እጦቱ - መቀበሪያውን አይነፍግም

መቼም የዝጌሩ በሽታ - ድሃ ነው ብሎ ላይተወኝ
ሞቴንም ከፊቷ ያድርገው - ሃገሬ እያለች ይመመኝ